Til deg som er vaksen

Kristin Bruknapp, avdelingsleiar og rådgjevar vaksenopplæring ved Sauda vidaregåande skule

Er utdanning noko du som vaksen tenkjer på og vurderer, er det viktigaste rådet å ta kontakt! Samtalen med oss rådgjevarar er heilt uforpliktande, og du får drøfta valet med nokon. Du får også informasjon om kva for er mogleg for deg. Dersom du vurderer vidaregåande opplæring eller høgare utdanning, bør du tenkja på kva yrke som passar for deg og din livssituasjon, og kva behov som finst i arbeidsmarknaden. I tillegg kan ein tenkja på kva erfaring og praksis du har, som du kan byggja vidare på. Det som er spesielt viktig for vaksne studentar, er at utdanningsløpet blir tilpassa livssituasjonen og økonomi, og her finst det mange ulike vegar mot målet. Mange lurer på om dei kan behalda jobben, samstundes som ein tar utdanning – og det kan dei stort sett. Mykje kan tilretteleggjast! Det kan bli krevjande, men utdanning gir ofte stor gevinst og tryggleik i andre enden.