Dette kan du gjere alt no

• Sjekk at BankID eller MinID fungerer – du treng det for å søkje.

• Avtal ein prat med rådgjevaren.

• Gå på yrkes- og utdanningsmessa og snakk med folk som jobbar i faget.

• Ring eller besøk ei bedrift du er nysgjerrig på.

• Lag ein kort CV – han trengst når du søkjer læreplass.

• Sjekk kva fag drøymestudiet ditt krev.

‍

Til deg som vil bli lærling

Mange læreplassar blir aldri lyste ut, og bedrifter i Ryfylke ser etter folk som vil noko. Det er bedrifta som vel, og ho vel gjerne den som viser interesse og vilje. Du søkjer i Vigo og direkte til bedrifta.

Start tidleg: finn bedrifter, lag ein kort CV og ta kontakt.

Ver klar tidleg på nyåret – det er då mange læreplassar blir lyste ut.

Bedriftene og kommunane kan ha eigne fristar, òg tidlegare enn Vigo.

RYTOPP er opplæringskontoret i Ryfylke. Kontakt dei eller bedrifta sjølv om ingen plass er utlyst.

QR-kodar: Lærebedrifter i Ryfylke · Slik søkjer du læreplass

‍

Til deg som går i 10. klasse

All søking til vidaregåande skjer på Vigo.no. Du loggar inn med MinID eller BankID, så sjekk at det fungerer i god tid. Vigo opnar etter nyttår, og du kan endre søknaden heilt fram til fristen. Det som står i Vigo på fristdagen, er det som gjeld.

Utforsk: Vilbli.no viser fag og vegar gjennom vidaregåande. Utdanning.no lèt deg utforske yrke. Utdanningiryfylke.no viser kva som finst her.

Tenk langt: Nokre studium krev bestemte fag. IT-studium kan til dømes krevje R1 eller S1+S2 i matematikk.

‍

Til deg som går på vidaregåande

Folkehøgskule: Eit år til å utforske. Ingen søknadsfrist, men opptaket startar alt hausten før – søk tidleg om du vil ha ei bestemt linje. Folkehogskole.no

Fagskule: Høgare yrkesfagleg utdanning som byggjer på vidaregåande, ofte på fagbrev. Fristane varierer – nokre har løpande opptak.

Høgskule og universitet: Gir bachelor og byggjer på studiekompetanse eller realkompetanse. Du søkjer via Samordnaopptak.no. Opptaksreglane er i endring, så sjekk det som gjeld for året du søkjer.

Studere heime: Ryfylke utdanningssenter har fagskule- og høgskuletilbod i regionen. Du kan ta utdanning utan å flytte.

Pengar: Når du har fått plass, søkjer du stipend og lån hos Lånekassen.no.

‍

Slik heng fristane saman

Vidaregåande og læreplass: Du søkjer i Vigo etter nyttår, og fristen er tidleg på våren. Nokre søkjarar har ein tidlegare frist, mellom anna dei med fortrinn, individuell behandling, minoritetsspråklege og lærekandidatar. Kommunane og bedriftene kan ha læreplassfristar som kjem før Vigo-fristen.

Høgare utdanning: Samordna opptak opnar etter nyttår, og hovudfristen er om våren. Nokre søkjarar, mellom anna dei som søkjer med realkompetanse, har tidlegare frist. Du kan endre rekkjefølgja på studieønska fram mot sommaren, og tilbod og svarfrist kjem om sommaren.

Folkehøgskule: Opptaket startar hausten før skulestart, og plassane blir fylte etter kvart.

Sjekk alltid årets fristar på Vigo.no, Samordnaopptak.no og hos bedrifta du søkjer til.

Du treng ikkje finne ut av alt åleine. Rådgjevaren på skulen, RYTOPP og fylkeskommunen hjelper deg vidare – det viktigaste er å ta kontakt.

‍

Til deg som er vaksen

Frå du er 19 år, kan du ta vidaregåande som vaksen. Du kan søkje og få rettleiing heile året, men søk tidleg på våren om du vil starte til hausten. Mange kan halde fram i jobben medan dei tek utdanning – ta kontakt for ein uforpliktande prat.

Den såkalla 23/5-regelen er òg ein veg inn i høgare utdanning seinare i livet.

Les meir på sauda.vgs.no