Interessa til mekanikar Ståle Svennes kom tidleg, og han byrja å skru allereie heime i Ulvik. Det har tatt han til Jelsa og Mibau Stema, med fagbrev i både landbruksmekanikk og anleggsmaskin.

– Kva ferdigheiter trengst for å trivast og lukkast i dette yrket?

– Du må vera interessert, ikkje redd for å bli skitten på hendene. Viss du er interessert, så finn du alltid ut av ting. Så må ein ta i eit tak og ha lyst til å få det fiksa. Og det er alltid nokon å spørja, fortel Svennes.

Ståle kan altså maskin, for å seia det mildt.

– Eg har skrudd litt i oppveksten, traktorar og ATV-ar og sånt, seier Svennes.

Det var heime i Ulvik, at Ståle blei introdusert til landbruksmaskinar og gleda ved praktisk arbeid. Då han skulle velja utdanning, var valet enkelt: Det måtte bli Voss jordbruksskule, som er del av Voss vidaregåande skule.

– Eg ville ha ein praktisk jobb, bruka nevane og skru, seier Svennes, som trivst godt med valet.

På Voss vgs. tok Svennes fagbrevet i landbruksmekanikk siste året på skulen. Fagbrevet som anleggsmekanikar tok han som lærling i bedrift. I 2023 byrja han som fiks ferdig mekanikar i Mibau Stema, Europas største pukkverk som ligg på Jelsa. I vedlikehaldsavdelinga er det mykje å bryna seg på fagleg. Avdelinga med 45 tilsette og 6 lærlingar har ansvar for å sikra at utstyr og maskinar er fungerer. Her er alt frå gravemaskin og dumparar.

Arbeidsdagen her er variert, noko Svennes har sansen for. Typiske oppgåver går på både drift og reparasjon.

– Det er service, dekkskift, reparasjonar etter periodisk kontroll, til dømes skifte av føringar, og feilsøking på elektrisk anlegg, seier han.

– Kva må ein kunna, eigentleg?

– Ein anleggsmekanikar må kunna noko om elektronikk, hydraulikksystem og klimakomponentar som skal redusera avgassane, seier Svennes.

Det inneber dessutan både sveising og aircondition-anleggg. Sjølv trivst Ståle med både variasjon og tempoet. Kvifor?

– Det er alltid noko å finna på her. Ikkje noko dødtid!